ఆ పుణ్యాత్ములే
పుట్టకపోయి వుంటే?...
ఓ బహుజన బిడ్డలారా..!
ఆయా తేదీల్లో
ఆ శుభ ఘడియల్లో
ఆ మహాత్ములు...
ఆ పుణ్యాత్ములు...
ఆ మహనీయులైన...
ఆ ఘనులు త్యాగధనులు...
ఆ దీనజన బాంధవులైన...
మహాత్మా జ్యోతిరావు ఫూలే
ఈ భూమిపై పుట్టకపోయి వుంటే...
పాఠశాలలు పెట్టకపోయి ఉంటే
డాక్టర్ బి ఆర్ అంబేద్కరే
ఈ జాతిలో పుట్టకపోయి వుంటే...
ఈ జాతిజాగృతి కోసం
కలం పట్టకపోయి వుంటే...
గళం విప్పకపోయి ఉంటే...
వీరిద్దరు పౌరహక్కులకోసం
ప్రశ్నించకపోయిఉంటే...
అగ్రవర్ణాల అరాచకాలను
ప్రతిఘటించకపోయిఉంటే...
అంటరానితనానికి ఆజ్యం పోసే
వర్ణవ్యవస్థపై తిరుగుబాటు
బావుటా ఎగురేయకపోయిఉంటే
పులులై గర్జించకపోయి ఉంటే...
సింహాలై గాండ్రించకపోయి ఉంటే...
కులనిర్మూలన కోసం జీవితాంతం
మనువాదులతో పోరాడకపోయి ఉంటే...
కాటువేసే ఆ కులసర్పాలను
సంహరించకపోయి వుంటే...
సమాధి చేయకపోయి ఉంటే...
రాజ్యాంగమే వ్రాయకపోయిఉంటే
ఇంకా ఎవరో వస్తారని...
ఏదో చేస్తారని ఎదురు చూసే...
నేటి ఈ బహుజనుల
బ్రతుకులు ఎలాగుండేవో..?
ఏమైవుండేవో ఎవరికెరుక..?
అమరుడైన అంబేద్కర్ కు తప్ప...
పైనున్న ఆ పరమాత్మకు తప్ప....
ఓ బహుజన బిడ్డలారా..!
ఆ పుణ్యమూర్తులే...
ఈ భూమిపై పుట్టకపోయి వుంటే?...
ఏకులుగా పుట్టిన
మీరు మేకులయ్యేవారా..?
బాకులుగా పుట్టిన
మీరు మరతుపాకులయ్యేవారా..?
ఊరిచివర పూరి గుడిశలో పుట్టిన
మీరు పులులయ్యే వారా..?
కర్ణకఠోరంగా కాకుల్లాగా అరిచే
మీరు కోకిల రాగాలు తీసేవారా..?
కడుపునిండా తిండిలేక
ఆకలికి అలమటించే మీరు
కటిక దారిద్ర్యాన్ని అనుభవించే
మీరు కలెక్టర్లయ్యేవారా...?
దళితజాతి హక్కులకోసం
ఒంటరి పోరాటం చేసిన...
సర్వస్వం త్యాగం చేసిన...
తమ ప్రాణాలనే ఫణంగా పెట్టిన
ఆ దళితబాంధవులు
ఆ అమర జీవులు...
ఆ జ్యోతిరావు ఫూలే...
ఆ బాబా సాహెబ్ అంబేద్కర్ ల...
స్మరణే మీకు ఒక ప్రేరణ
వారి ఆశయాల సాధనకోసం...
దళితజాతి రాజ్యాధికారం కోసం...
సమ సమాజ స్థాపనకోసం...
నిరంతరం పోరాడాలి...కడకు
ప్రాణార్పణకైనా సిద్దమవ్వాలి...జై భీం...
పోలయ్య కవి కూకట్లపల్లి హైదరాబాద్
Comments
Post a Comment