పిరికి పందలో... గొర్రెల మందలో... కవిత...

 

పిరికి పందలో...గొర్రెల మందలో..

సంకల్పబలం లేని...
సత్సాంగత్యమెరుగని...
సన్నిహితుల ఉచిత
సలహాలు స్వీకరించని...
సహాయాన్ని అర్థించని...
సమస్యలకు పరిష్కారం 
చావు కాదు కాదు కాదన్న
నగ్నసత్యాన్ని గ్రహించని...

జన్మనిచ్చిన అమ్మానాన్నలను
ఒక్కక్షణమైనా గుర్తుచేసుకోని...
ప్రాణంపోసిన ఆ పరమాత్మను  
ఒక్క క్షణమైనా స్మరించుకోని...
సమయస్ఫూర్తితో వ్యవహరించని...
సమస్యలను ధైర్యంతోఎదుర్కోలేని...

ఆవేశం తప్ప ఆలోచనలేని
అమాయకత్వం తప్ప 
ఆత్మహత్యలపై అకాలమృత్యువుపై 
ఆవగింజంతైనా అవగాహనలేని

ఓ బలహీనమైన క్షణాల్లో
బలవన్మరణానికి పాల్పడే
బంగారుభవిష్యత్తును బలితీసుకొనే
సకాలంలో సరైన మార్గాల్లో 
పరిష్కారాలకై పట్టుదలతో అన్వేషించని

ఈ జీవితం వ్యర్థం వ్యర్థమనే తప్ప దానికో 

అర్థం పరమార్ధముందని సత్యాన్ని తెలుసుకోని

 
కుటుంబ పరువును కుప్పకూల్చే
పచ్చని కాపురాల్లో చిచ్చు రగిలించే
చింతలు చీకాకులు లేని చిరునవ్వుల 
కుటుంబాన్ని చిమ్మచీకటిలో ముంచేసే

ఆ మూర్ఖులు...
ఆ మొండివారు...
ఆ ఆవేశపరులు...
గతజన్మలో పిరికిపందలో...గొర్రెలమందలో
ఎవరికెరుక ? జన్మనిచ్చిన ఆ పరమాత్మకు తప్ప... 

రచన.

"కవి రత్న"

"సహస్ర కవి"

పోలయ్య కూకట్లపల్లి

అత్తాపూర్ హైదరాబాద్