ఆగకు...ఆగకు...
స్నానమాడేందుకు
సంద్రంలో ఎగిసిపడే
అల్లరిఅలలు ఆగేంతవరకు...
ఊగకు...ఊగకు...
ఉద్రేకంతో ఊపిరి
ఆగిపోయేంతవరకు...
నీ నరాలు తెగేంతవరకు...
వాగకు...వాగకు...
నీలోని అవివేకం...
అజ్ఞానం...అహంకారం..
బట్టబయలయేంతవరకు...
త్రాగకు త్రాగకు...
నీ "ఇంట్లో" ఆస్తిఅంతా
ఆవిరయ్యేంత వరకు...
అప్పుల్లో చిక్కుకుని నీ
ఆలూ బిడ్డలు ఆకలితో
అలమటించేంత వరకు...
నీ "ఒంట్లో" ఆరోగ్యం ఖర్చై
కన్నుమూసి కాటికెళ్ళేంతవరకు...
త్రుంచకు...త్రుంచకు...
విరితోటలో విరబూసి...
గుడికి చేరని గులాబీలను...
ముంచకు...ముంచకు...
నవ్వుతూ నవ్వుతూ నమ్మిన
వారిని నట్టేట ముంచకు...
వంచకు...వంచకు...
ఎవరికీ తలవంచకు...
ఎన్ని సమస్యలెదురైనా...
ఎవరెన్ని నిందలు మోపినా...
ఎంతగా విధి విషం చిమ్మినా...
ఎన్ని ఎదురు దెబ్బలు తగిలినా...
రెచ్చిపోకు...రెచ్చిపోకు...
పిచ్చికోపంతో...
రక్తసంబంధాలన్నీ
రద్దయ్యేంతవరకు...
ద్వేషించకు...ద్వేషించకు...
ఎవరినీ పగాప్రతీకారంతో...
సత్సంబంధాలన్నీ
సమాధి అయ్యేంతవరకు...
దాచుకోకు...దాచుకోకు...
కసాయితనాన్ని...మదిలో
బంధు మిత్రులందరూ
బద్ధశత్రువులయ్యేంతవరకు...
ఓడిపోయి ఒంటరివయ్యేంతవరకు...
ప్రేమించు...ప్రేమించు...
ప్రకృతిలోని ప్రతిజీవిని...
విశ్వసించు...విశ్వసించు
జన్మనిచ్చింది అమ్మని
ఊపిరి పోసింది ఆ బ్రహ్మని
ఆరాధించు...
ఆరాధించు...ఆశతో...
ప్రార్థించు...ప్రార్థించు...
నిత్యం భయభక్తులతో...
వరాల వర్షం కురిపించే...
కరుణామయుడైన ఆ పరమాత్మను...
"కోరిన కోరికలు" తీరేంతవరకు...
"కన్న కలలు" ఫలించేంతవరకు...
ముందు జన్మలోనైనా
"ముక్తి" లభించేంతవరకు...
ఓ మిత్రమా !
ఓ నా ప్రియ నేస్తమా !
ఇదే ఇదే...చిరుచిట్కా...
ఇదే ఇదే...రాజమార్గం...
ఇదే ఇదే...సుఖజీవన సూత్రం...
మనిషి...మహనీయుడయ్యేందుకు...
అస్తమించినా...అమరుడైపోయేందుకు...
రచన:
"కవి రత్న"
"సహస్ర కవి"
పోలయ్య కూకట్లపల్లి
అత్తాపూర్ ...హైదరాబాద్
చరవాణి...9110784502
Comments
Post a Comment