108... కొత్త కవితలు....

విషయ సూచిక.....108 కవితలు

1. బడిగంటలు మ్రోగిన వేళ...

2. సుఖమయ జీవితానికి...

(18 అయ్యప్ప మెట్లు)

3. గురువులకు వందనం !

పాదాభివందనం !!

4. జై పాతాళభైరవి ! (హాస్య కవిత)

5. అన్న పోలన్న సుమధుర సుభాషితం !

విన్న చాలు జీవితం సువర్ణ శోభితం !!

6. సూర్యసందేశం

7. మీరు వీరులే ! రాజ్యాన్ని ఏలే రాజులే !

8. మూడు కేకలు... మూడు లేఖలు

9. ఉడుతలు కాదు...ఊసరవెళ్ళులు...

10. నడిరోడ్డులో నరమేధం ?

11. తాలిబాన్లా ? త్రాచుపాములా?

12. రాక్షసులే రాజులైతే....

13. ఏది నిజమైన సంక్రాంతి ?

14. చెప్పలేము... మినీ కవిత

15. నిన్నటి తేనె‌...నేడు విషం ?

16. ఓర్పు నశించిన ఓటరు ...

17. కరోనా సుభాషితాలు- కాంతి కిరణాలు-

18. ఇంట్లోకూర్చుంటే... ఏంటి లాభం?

19. కోపం కొరివిదెయ్యమైతే ?

20. ఓ అందమా నీవెక్కడ ?

21. ఓ సౌందర్యమా నీవెక్కడ ?

22. దైవమా ! దారిచూపుమా !!

23. ప్రతిభకే పట్టాభిషేకం...

24. బ్రతుకు జట్కాబండి...

25. కార్గిల్ వీరులకు కన్నీటి వీడ్కోలు....

26. మన మాటలే మనకు ఉరి సిరి ఊపిరి

27. అఖండ విజయం

28. అణుబాంబు కన్న

ఆత్మవిశ్వాసమే మిన్న

29. పోలన్న కవి సుభాషితాలు...

30. అఖండ విజయం

31. అణుబాంబు కన్న

ఆత్మవిశ్వాసమే మిన్న

32. స్నేహబంధం

33. మననోటి మాటలు

34. ఓ కవీ ఏమిటి నీకర్తవ్యం ?

35. సమస్య ఏదైనాఎదురీదు

36. సహనమే సంపద...

37. జై బోలో జై బోలో!

గిడుగు తాతకు జైబోలో!!

38. ఓ తెలుగు భారతీ!

మీకు ప్రణామం ..ప్రణామం...

39. విలువ ఎరిగినవారే విజ్ఞులు

40.ఎవరితరం కాదు

41. వద్దువద్దు...ముద్దుముద్దు

42. పోలన్న కవి సూక్తి సుధలు

43. నిద్రలో సైతం నీలక్ష్యాన్ని మరువకు!

44. గతం...ఒక పెనుభూతం ?

45. సాహసమే ఊపిరైతే

సమస్తం సాధ్యమే !

46. స్పందించు స్నేహహస్త మందించు

47. కాలంచేసే ఇంద్రజాలం...

48. పెళ్లినాటి ప్రమాణం....

49. ప్రతిమనిషి పరమాత్మ స్వరూపమే

50. పోరాడితేపోయేదేముంది చెప్పండి?

51. పోలన్న కవి సూక్తి సుధలు

52. నిండునూరేళ్ళు...(ని అక్షరంతో కవిత)

53. ఆశతో అర్థించా.!..భక్తితో ప్రార్థించా !

54. ముందుజన్మలో ముక్తి

55. వచ్చేసింది టీకా - పిసికేస్తాం నీ పీక...

56. నా భారతనారి...అంటే ?

57. కాదు కాదు ఆ కొంగ...

నీవే నిజమైన దొంగ

58. ఆర్జిస్తే ఆస్తి - నిద్ర నాస్తి

59. నీకు నాకేం తెలుసు...

నిమ్మకాయ పులుసు !!

60. కరోనా ముప్పు తప్ప...

ఈ పదిసూత్రాలు పాటీస్తే..

61. ఇది కలకాదు‌ పచ్చినిజం...???

62. ఏలనోయ్ నీ కింత ఆశ

63. సంస్కారం! సాస్టాంగ నమస్కారం!!

64. అక్కకాదు తులసిమొక్క

65. పోలన్న కవి సూక్తి సుధ!

66. విజయానికి దారులెన్నో ...

67. మూర్ఖులు - ముసలి లక్షణాలు!

68. చక్కని సంసార సందేశం !

69. పోలన్నకవి సూక్తి సుధామృతం

70. విజయం - అపజయం

71. నడిసంద్రంలో నావ

72. ప్రేమిస్తే పచ్చదనమే !!

73. నేడే తెలిసింది ఓనిండునిజం ...

74. అడుగు... వెతుకు...తట్టు...

75. రక్షా బంధన్ ...రక్త సంబంధం

76. చింతకాయ...ఎంతమాయ...

77. కామాంధులుంటారు కాస్త జాగ్రత్త!

78. ఎవరితరం కాదు

79. నీళ్ళు నిద్రపోతాయి...

80. మృత్యువు ముందే మూడుముళ్ళు

(మ అక్షరంతో భావకవిత)

82. పేదవాడిగా పుట్టడం నీ తప్పు కాదు...

83. ఆఫ్గనిస్తానా? ...అగ్నిగుండమా?

84. మై ఫ్రెండ్లీ ఎనిమీస్

85. ఉంటే - ఉంటే - ఉంటే?

86. పురోభివృద్ధికి పునాదిరాళ్ళు

87. గుణపాఠాలే మన గురువులు

88. మూగజీవులను ప్రేమిద్దాం...

89. మందులా ? కాదు...

మానవత్వమే కొరత

90. నిన్న లేని కొత్తదారి

91. ముందు పోల్చుకో !

తరువాత తేల్చుకో!!

92. రోగాలు ‌లేని రాని రోజు ?

93. మంచితరుణం మించిపోతే???

94. పరమాత్మమెచ్చిన"పచ్చని కాపురం"

95. వన్ సైడ్ లవ్" అంటే???

96. రెండు సార్లు ......

97. సలహాలు వారివి నిర్ణయాలు‌ మనవి

98. చూడకు ఎవరినీ చులకనగా....

99. విధిఆడే వింతనాటకం

100. ఒద్దురా వొద్దురా !

వెలిగితేనెే ముద్దురా!!

101. నమ్మకు నమ్మకు నమ్మితే నరకమే!

102. ఒక చిన్న కండీషన్ ఏమిటది?

103. ప్రేమిస్తే పచ్చదనమే

104. ఎవరు వారు ?

వారే మన వీరజవాన్లు

105. "నవసమాజ నిర్మాణం"

106. ఓ నవదంపతులారా !

107. ఏమీటో ఈ సృష్టిరహస్యం?

108. రెండు వైపులా...

రెండువందల గ్రాములే ?

1. బడిగంటలు మ్రోగిన వేళ...

అందరి హృదయాలలో ఆనంద హేల...

అందుకే గురువులారా ! గుర్తుంచుకోండి!

మీ చేతుల్లో...

బుక్సున్నాయి బోధించేందుకు...

బెత్తాలున్నాయి శిక్షించేందుకు...

మీ చేతిలో...

మట్టి ముద్దలు సిద్దంగా ఉన్నాయి...

కావడిలో కుండలుగా మారేందుకు...

మీ చేతిలో...

చిరుదివ్వెలున్నాయి చిమ్మ చీకటిని...

చీల్చి వెలుగులను విరజిమ్మేందుకు...

మీ చేతుల్లో...

ఉలులున్నాయి ఎన్నో శిలలున్నాయి...

సుందరమైన శిల్పాలను చెక్కేందుకు...

మీ చేతుల్లో...

ఎదిగే అమాయకపు పిల్లల బంగారు...

భవిష్యత్తులు‌న్నాయి తీర్చిదిద్దేందుకు...

మీ చేతుల్లో...

విరిసీవిరవని మొగ్గలున్నాయి గుబాళించే...

పూలున్నాయి పూజకు సమర్పించేందుకు...

గురువులారా!గుర్తుంచుకోండి !

మీరే వారికి మార్గ నిర్దేశకులు...

మీరే వారికి కనిపించే దైవాలు...

మీరే వారికి కనని అమ్మానాన్నలు...

గురువులారా! గుర్తుంచుకోండి!!

మీ విద్యార్థుల్ని,

వీరులుగా శూరులుగా

రాళ్ళలో రత్నాలుగా,

మట్టిలో మాణిక్యాలుగా

భావిభారత పౌరులుగా,

భరతమాత ముద్దుబిడ్డలుగా

తీర్చిదిద్దే బాధ్యత మీదే,

తీరని మీ గురువుల ఋణం

తల్లిదండ్రులఋణం తీర్చుకునే

బాధ్యత విద్యార్ధులదే

2.సుఖమయ జీవితానికి...

(18 అయ్యప్ప మెట్లు)

1) రాత్రి 10 గంటలకు "పడక" తెల్లవారుజామున

4 గంటలకు "నడక" సూత్రాన్ని తు.చ.తప్పక పాటించడం

2) నిద్ర మేల్కొన్న తర్వాత,

లేచి మంచం పైనే

కూర్చుని చిన్న ప్రార్థన చేసుకోవడం

3) క్రమం తప్పకుండా ప్రతిరోజూ

వ్యాయామం, యోగా, ధ్యానం చేయడం

4) ఉదయం 5 గంటలలోపు కాలకృత్యాలన్నీ

తీర్చుకోవడం స్నానం చేయడం

5) సూర్యోదయానికి ముందే ప్రతిరోజు

పూజా కార్యక్రమాలను పూర్తి చేయడం

6) టీవీ చూడకుండా & ప్రశాంతంగా

అల్పాహారం భోజనం తీసుకోవడం

7) 24 గంటలు మంచి ప్రవర్తనను కొనసాగించడం

అందరినీ పలకరించడం మర్యాదగా మాట్లాడం

8) whatsapp, face book లకు

వీలైనంత తక్కువ సమయం కేటాయించడం

9) సొంత భార్యను పిల్లలను ప్రేమించడం వారితో కలిసి తినడం తిరగడం మాట్లాడడం ఆనందంగా గడపడం

10) తల్లిదండ్రులను గౌరవించడం &

వారిని జాగ్రత్తగా చూసుకోవడం ప్రేమగా పలకరించడం

11) అతిథులను ఆదరించడం గౌరవించడం

12) పేదవారికి చేయగలిగినంత సహాయం చేయడం

13) ఇతరులను బాధపెట్టకుండా ఉండడం

14) ఇతరులను మోసం చేయకుండా ఉండడం

15) మన కష్టాలు ఎన్నైనా ఏమైనా సరే

దేవునిపై గట్టి విశ్వాసం కలిగిఉండడం

16) ఇతరులకు బోధించే ముందు, మనం అనుసరించడం

17) ఎవరిమీద కోపం కసి కక్ష పగా ప్రతీకారం.అసూయ ద్వేషాలు ఆందోళన లేకుండా ప్రశాంతచిత్తంతో నవ్వుతూ నవ్విస్తూ బ్రతకడం

18) బైబిల్ భగవద్గీత ఖురాన్ భారత భాగవత

రామాయణ తదితర ఆధ్యాత్మిక గ్రంధాలను ప్రతినిత్యం పఠించడం, నేర్చుకున్న జ్ఞానాన్ని ,ఆర్జించిన ధనాన్ని పదిమందికి పంచడం,అనుభవించడం ఆత్మతృప్తితో

ఆ పరమాత్మను చేరడం....ఇదే ఈ జీవితానికి అర్థం పరమార్థమని తెలుసుకోవడం...

3. గురువులకు వందనం ! పాదాభివందనం !!

అజ్ఞానపు శిధిలావస్థలో నున్న శిలలను

అందమైన సుందర శిల్పాలుగా చెక్కే

అక్షర శిల్పులే "అమరశిల్పి జక్కన్నలే"...గురువులంటే‌ !

సమాజంలో సమస్యల సుడిగుండంలో

చిక్కుకున్ననాడు సకాలంలో స్పందించే

అభయహస్తాలనందించే "ఆప్తమిత్రులే"...గురువులంటే !

అజ్ఞానాంధకారంలో బంధీలైననాడు

ఆపదలో ఆదుకునే "ఆపద్బాంధవులే"...గురువులంటే !

జన్మనిచ్చిన అమ్మ పాలిస్తే నాన్న లాలిస్తే

బ్రహ్మ వ్రాసిన తలరాతల్ని మార్చి అందమైన

బ్రతుకు పుస్తకాన్ని అందించే

అపర బ్రహ్మలే..."ఆకాశ దీపాలే"...గురువులంటే !

అక్షరాల తోటల్లో తిప్పే అభివృద్ధి బాటల్లో నడిపే

ఆశాజ్యోతులే... "ఆదర్శమూర్తులే"...గురువులంటే !

ఉజ్వల భవిష్యత్తును ఉన్నతమైన వ్యక్తిత్వాన్ని

ఉత్కృష్టమైన జీవితాన్ని ప్రసాదించే

ప్రత్యక్షదైవాలే "కననిఅమ్మానాన్నలే"...గురువులంటే !

అట్టి గురుదేవుళ్ళకు కవితా కుసుమాలనర్పించి

గుండెల్లో గుడికట్టి గురుదేవుళ్ళను పూజిద్దాం!

పవిత్రమైన వారి పాదాలకు పాలాభిషేకం చేద్దాం !

అందరికీ ఉపాధ్యాయదినోత్సవ శుభాకాంక్షలందజేద్దాం !

4.జై పాతాళభైరవి ! (హాస్య కవిత)

జై పాతాళభైరవి !

బాలకా ! ఏమిరా నీ కోరిక ?

తల్లీ ! నేను అప్పుల్లో మునిగిపోయా...

"మోకాళ్ళోతుకు" కూరుకుపోయా...

భయపడకురా !

ఢింభకా ! బయట పడవచ్చునురా !

జై పాతాళభైరవి !

బాలకా! ఏమిరా నీ కోరిక ?

తల్లీ ! నేను త్రాగుడుకు బానిసనైపోయా...

"నడుముల్లోతుకు" మునిగిపోయా...

భయపడకురా !

ఢింభకా ! బయట పడవచ్చునురా !

జై పాతాళభైరవి !

బాలకా ! మళ్ళీ ఏమిరా నీ కోరిక ?

తల్లీ ! నేను డ్రగ్స్ కు బానిసనైపోయా...

"భుజాలవరకు" మునిగిపోయా...

భయపడకురా !

ఢింభకా ! బయట పడవచ్చునురా !

జై పాతాళభైరవి !

బాలకా ! ఏమిరా నీ కోరిక ?

తల్లీ ! ప్రేమపిచ్చి పట్టి నేను

"పీకల్లోతుకు" మునిగిపోయా...

భయపడకురా !

ఢింభకా ! బయట పడవచ్చునురా !

జై పాతాళభైరవి !

బాలకా ! ఏమిరా నీ కోరిక ?

తల్లి నేను నెట్టులో

"జుట్ఠు"దాకా కూరుకుపోయా

భయపడకురా !

ఢింభకా ! బయట పడవచ్చునురా !

జై పాతాళభైరవి !

బాలకా ! మళ్ళీ ఏమిరా నీ కోరిక ?

తల్లి నేను నిద్రాహారాలుమాని

వాట్సాప్ ఫేస్ బుక్కుల్లో

ఎరక్కపోయి ఇరుక్కుపోయా !

లైకులంటూ కామెంట్లంటూ కలవరిస్తున్నా

ఔరా బాలకా ! బానిసలైతే సెల్లుకు...

బ్రతుకు భారమేరా ! ఘోరమేరా !

దుర్భరమేరా ! దుఃఖభరితమేరా !

అందుకే ఓ బాలకా !

తెలుసుకోరా ! ఓ నిండునిజం !

"వాట్సాప్

అంటే ఒక ఊబిరా !

జారిపోతే అందులోకి

జాతకాలే మారిపోవురా !

తలరాతలే తారుమారౌనురా !

ఫేస్ బుక్ కాలాన్ని హరించే‌ ఓ కార్చిచ్చురా !

అందుకే ఓ బాలకా !

తెలుసుకోరా ! ఓ నిండునిజం !

సెల్లు‌మాయలో పడిపౌవద్దురా!

బానిసలై సెల్లుకు బలైపోవద్దురా!

మీ గొయ్యిని మీరే తవ్వుకోవద్దురా!

మీ కంటిని మీరే పొడుచుకోవద్దురా!

మీ ఇంటికి మీరే నిప్పు పెట్టుకోవద్దురా!

మీరు కూర్చున్న కొమ్మను మీరే నరుక్కోవద్ధురా!

అందుకేరా ఓ బాలకా !

జాగ్రత్త ...తస్మాత్ జాగ్రత్త!

మీ సెల్లు జాగ్రత్త ! మీ కళ్ళు జాగ్రత్త !

మీ ఒళ్ళు జాగ్రత్త‌!

5.అన్న పోలన్న సుమధుర సుభాషితం !

విన్న చాలు జీవితం సువర్ణ శోభితం !!

ఎప్పుడూ ఆనందంగానే వుండండి !

అనవసరంగా ఆందోళన చెందకండి!

నిదానమే ప్రధానం అన్నది నిన్నటి మాట!

ఈకంప్యూటర్ యుగంలో వేగమే ప్రధానం!

ఒకింట పేదవాడిగా పుట్టడం తప్పు కాదు!

కానీపేదవాడిగా మరణించడమే పెద్దనేరం!

చిరునవ్వులే చీకటిలో వెలిగే చిరుదీపాలు!

కోపతాపాలే తీరనిశాపాలు నరకకూపాలు!

ప్రతినిత్యం మరువకు సత్యమునే బోధించు!

నటించకు నిన్నునమ్మినవారిని నట్టేటముంచకు!

పురోభివృద్ధికే నీ ఆలోచనలు పునాది కావాలి!

సమయాన్ని సత్సంకల్పాలను సమాధిచేయకు!

ఏనాడైనా ఎవరిని కూడా భయపెట్టకు‌ బాధించకు!

ఎవరైనా ఎప్పుడైనా ఆపదలోవుంటే తక్షణమే ఆదుకో!

బిందువులే సింధువైనట్లు నేటిపొదుపే రేపటిమదుపు!

దేనినీ నేడు వృధా చేయకు రేపు లేదని వ్యధ చెందకు!

కదలని మెదలని ఉలుకు పలుకులేని శిలలా వుండకు!

నిరంతరం ఉవ్వెత్తున ఎగిసిపడే కడలి కెరటంలా వుండు!

నేడు నిరుపేదలకు అనాధలకు ఇష్టంతో ఇచ్చువారు!

రేపు ఆ పరమాత్మ నుండి పుష్కలంగా పుచ్చుకుంటారు!

ఎప్పుడైనా ఏనాడైనా పడినా సరే పైకి లేవడానికి!

పక్షిలాఎగరడానికి మొక్కలాఎదగడానికే ప్రయత్నించు!

ఏనాడు విడిపోవడానికి చెడిపోవడానికి పాతాళంలో పడిపోవడానికి పతనమైపోవడానికి ప్రయత్నించకు!

ప్రతివారిని ప్రేమించు అందరిలో ఆ దైవాన్ని దర్శించు!

ఎవరినీ అకారణంగా ద్వేషించకు కోపంతో దూషించకు!

6.సూర్యసందేశం

అది

చేయి తిరిగిన

ఎంతో నైపుణ్యమున్న

ఓ ఫోటోగ్రాఫర్ ట్రిక్కే ఐనా

దానికి ఒక లెక్క ఉంది

అందులో అనంతమైన

"సూర్యసందేశం" దాగి ఉంది

ఈ జీవితమే ఒక పయనమని...

అది తూర్పు వైపుకేనని...

చేరలేని సుదూర తీరాలకేనని...

ఎంత దూరమైనా

ఎంతో భారమైనా

ఎంతటి అంధకారమైనా

వెలుగు వేట

వెలుగు వెతుకులాట

వెర్రతనమేమీ కాదని...

వెలుగునే మోసుకుపోయేవారికి

ఇక చీకటంటూ ఎక్కడిదని...

ఎంత దూరప్రయాణమైనా

ఒక అడుగుతోనే ప్రారంభమని...

సూర్యునికంటే ముందులేచిన వాళ్ళు

సుఖపడతారని...

పుష్టికరమైన ఆహారం తీసుకున్నవారు

షష్టిపూర్తి చేసుకుంటారని...

ఆలస్యంగా నిద్రలేచిన బద్దకస్తులు

సూర్యోదయాన్ని చూడలేరని...

విజయాన్ని చూసి ఓటమి

వెలుగును చూసి చీకటి భయపడుతుందని...

సూర్యుడు ప్రతిమనిషికి

ఒక స్ఫూర్తి ప్రదాతయని...

ఆ సూర్యుని శక్తి అపారమైన

ఆ భగవంతునిపై భక్తి

ఉన్న ప్రతివ్యక్తి పొందునని...ముందుజన్మలో ముక్తి

7.మీరు వీరులే ! రాజ్యాన్ని ఏలే రాజులే !

తరతరాలుగా...

అంటరానితనానికి...

అగ్రవర్ణాల ఆధిపత్యానికి...

అహంకారానికి అంధవిశ్వాసాలకు...

బలైపోయిన ఓ బహుజనులారా !

ఇకనైనా నిద్ర మేల్కొని

నిజాలు తెలుసుకోవాలి నిప్పైరగలాలి !

మీలో ఆవేశం తగ్గి ఆలోచన పెరగాలి !

మీలో అఖండమైన ఓ శక్తినిక్షిప్తమై ఉందన్న

ఓ పచ్చినిజాన్ని మీరు తెలుసుకోవాలి !

మీరు వేరువేరుగా ఉంటే

వేరులేని చెట్టులా కుప్పకూలిపోతారు !

ఎన్నేళ్ళు గడిచినా తిరిగి చిగురించలేరు !

మీరొకరికొకరు

అండగా ఉంటే

మండే సూర్యులౌతారు !

మనువాదుల్ని మసి చేస్తారు !

కళ్ళుతెరిచి ఒక్కసారి చూడండి !

కలిసివున్న మిమ్మల్ని విభజించాలనే

తెరవెనుక కుట్రల్ని తెలుసుకోండి !

ఒకరినొకరు ప్రేమించుకోండి ద్వేషించుకోకండి !

దూషించుకోవడం మానుకోండి !

గౌరవించుకోవడం నేర్చుకోండి !

శూలాలవంటి సూటిపోటిమాటలతో

గాయపరుచుకోవడం మానుకోండి !

సహాయం చేసుకోండి ! సహకరించుకోండి !

తప్పుచేసినా ముందు ఒప్పుకోండి !

ఒకరినొకరు క్షమించుకోండి ! మీరంతా

ఏకమైతే మీరె రాజ్యాలనేలే రాజులౌతారు !

అమరజీవి అంబేడ్కర్ ఆఖరి ఆశయమదే

అది సాధించాలంటే వారి కల నెరవేరాలంటే

ఆ మహనీయుని తీరని కోరిక తీరాలంటే

మీలో విజ్ఞానం పెరగాలి ! విప్లవం రావాలి !

ఐక్యత సఖ్యతే మీ ఆయుధం కావాలి

మీరు విజయశంఖారావం పూరించాలి !

ఔనిది నిజం ప్రశ్నిస్తేనే...

పులులై పోరాడితేనే...

సమిష్టిగా ప్రతిఘటిస్తేనే...

పోయిన హక్కులు పొందేది...

జీవితాలను త్యాగం చేస్తేనే...

రక్తాన్ని చిందిస్తేనే...రాజ్యాధికారం దక్కేది...

8.మూడు కేకలు... మూడు లేఖలు

పోస్ట్.....

మొదటి కేక...మొదటిలేఖ

మిలిటరిలోవున్న భర్త నుండి

భార్యకు...."అందిన ప్రేమలేఖ"....

అదిచూడగానే ఆమె ముఖమంతా

ఏడు రంగుల ఇంద్రధనుస్సయింది

హృదయం ఆనందంతో ఉప్పొంగింది

ఒళ్ళంతా త్రుళ్ళింతా మనసంతా పులకింత

భర్త.... దూరాన...ఎక్కడో మంచుకొండల్లో

గుర్తుకురాని రోజంటూ లేదు

ఎన్నో రోజులు కళ్ళు కాయలు కాసేలా

ఎదురుచూసింది, నిదురకాసింది

కలిసి కాపురం చేసిన కొద్ది రోజుల్ని

ఆ మధుర జ్ఞాపకాలను గుర్తు చేసే

ఆ ఉత్తరం, భర్తనుండి రాగానే, చదవగానే

ఆమె కళ్ళల్లో నీళ్ళు గిర్రున తిరిగాయి

అవి కన్నీళ్ళు కావు...."ఆనందబాష్పాలు"

పోస్ట్... పోస్ట్...

రెండవ కేక... రెండవ లేఖ

మిలిటరిలోవున్న కొడుకు నుండి

తల్లిదండ్రులకు "అందిన మనియార్డర్"....

ఆ డబ్బు అందగానే వారి ఆనందం

వర్ణణాతీతం అది అనుభవైకవేద్యం

తాము కష్టపడి చదివించినందుకు

తాము కన్న కలలు సాకారమైనందుకు

తమ బిడ్డ గొప్ప ప్రయోజకుడైనందుకు

ఒక మంచి ఉద్యోగం చేస్తున్నందుకు

తమను మరిచిపోకుండా నెలనెలా

మనియార్డర్ ను పంపుతున్నందుకు, మంచి

బిడ్డనే "కన్నారని" పదిమంది "అన్నారని"

ఆ తల్లిదండ్రుల కళ్ళళ్ళో నీళ్ళు గిర్రున తిరిగాయి

అవి కన్నీళ్ళు కావు...."ఆనందబాష్పాలు"

పోస్ట్... పోస్ట్... పోస్ట్...

మూడవ కేక... మూడవ లేఖ

మిలిటరి నుండి "అందిన టెలిగ్రామ్"...

కుటుంబానికి అది ఒక "విషాదకర వార్త"

అది అందుకునే ముందు

భార్య చేతులు భయంతో వణికాయి,

అదిమంచుకొండలనుడి

వచ్చిన "మరణవార్త"

తమ ఇంటి దీపమైన

ఒక్కగానొక్క కొడుకు

దేశసరిహద్దుల్లో శత్రువులతో

పోరాడి పోరాడి

వీరమరణం పొందాడన్న

"విషాదకర వార్త"

కడుపుతో వున్న భార్య

కాలి క్రింద భూమి కదిలింది

ముసలి తల్లిదండ్రుల గుండెలు ముక్కలైపోయాయి

ఊరు ఊరంతా ఉలిక్కి పడింది

ఇళ్ళంతా శోకసంద్రమైంది,

అందరి కళ్ళళ్ళో కన్నీరే"

ఏ చేతితో నైతే... "ప్రేమలేఖ" ను అందించానో

ఏ చేతితో నైతే..."మనియార్డర్ "ను అందించానో

అదే చేతితో..."మరణవార్త" నందించానంటూ

వెక్కి వెక్కి ఏడ్చిన...."ఆ ఊరి పోస్టమాన్" కళ్ళల్లో

నీళ్ళు గిర్రున తిరిగాయి ...అవి ఆనందబాష్పాలు కాదు

ఉప్పొంగిన పాతాళగంగ ఆవీరజవాన్ పాదాలు కడగంగ

(అక్టోబర్ 9 వ తేదీన ప్రపంచ తపాలా దినోత్సవం

సందర్భంగా,తపాల సిబ్బందికి శుభాకాంక్షలతో...)

9.ఉడుతలు కాదు...ఊసరవెళ్ళులు...

ఆరంగం ఓరంగస్థలం

అందరూ మహానటులే

అక్కడున్నది

ఉడుతలుకాదు ఊసరవెళ్ళులని

అది మొసళ్ళ మోసగాళ్ళమయమని

అది రక్తంత్రాగే రాక్షసమూకల రంగమని

తెలుసుకో నేస్తమా ! నిజం తెలుసుకో!

అణుక్షణం అతిజాగ్రత్తగా మసలుకో !

అక్కడ పరిచయమయ్యేవారు

పైకి ప్రాణమిత్రులని లోనవారు బద్దశత్రులని

కనిపిస్తే వాళ్ళు కాళ్లకు నమస్కారం చేస్తారని

కాని, రేపువారే కడుపులో కత్తులుంచుకొని

కౌగలించుకుంటారని

తెలుసుకో నేస్తమా ! నిజం తెలుసుకో!

అణుక్షణం అతిజాగ్రత్తగా మసలుకో !

అక్కడందరూ మాయమాటల మాంత్రికులేనని

అరచేతిలో స్వర్గం చూపించే అఖండులేనని

నమ్మించి నట్టేటముంచే నయవంచకులేనని

తెలుసుకో నేస్తమా ! నిజం తెలుసుకో!

అణుక్షణం అతిజాగ్రత్తగా మసలుకో !

అక్కడందరూ ఆశబోతులు అబద్ధికులేనని

సిగ్గూ లజ్జలేనివాళ్ళు నీముందే వుంటారని

మానవత్వమన్న పదానికి అర్థం తెలియని

మూర్ఖులు ముసుగులు వేసుకొని నీ ప్రక్కనే

గుంట నక్కల్లా గజ్జి కుక్కల్లా నక్కివుంటారని

తెలుసుకో నేస్తమా ! నిజం తెలుసుకో!

అణుక్షణం అతిజాగ్రత్తగా మసలుకో !

10.నడిరోడ్డులో నరమేధం ?

ఆప్ఘాన్

అధ్యక్ష భవనాన్ని ఆక్రమించేసి

అమాయకపు ప్రజలను

భయభ్రాంతులకు గురిచేస్తున్న

కఠిన శిక్షలు‌ వేస్తున్న

తప్పులు చేస్తే తలలు నరికేస్తున్న

తలపాగాలతో తిరుగుతున్న

తలపొగరు ఆ తాలిబాన్లు

పగబట్టిన త్రాచుపాములే

పాపం ప్రజలు

పులులు వేటాడే జింకల్లా

తోడేళ్ళు వెంటాడే మేకల్లా

చెల్లాచెదురైపోతున్నారు

పిల్లాపాపలతో ప్రాణభయంతో

పరుగులు ‌పెడుతున్నారు

విమానరెక్కలకు వ్రేలాడుతున్నారు

పిట్టల్లా నేల రాలిపోతున్నారు

ప్రాణాలు కోల్పోతున్నారు

సమాధుల్లో‌ దాక్కోవడాని

సైతం సిద్ధపడుతున్నారు

ఎందుకు ? ఎందుకు ? ఎందుకు ?

కారణమొక్కటే

అదిగో నడిరోడ్డుపై ఆ నరమేధమే?

దయా దాక్షిణ్యం వారిలో శూన్యం

మంచితనం

మానవత్వం మటుమాయం

కళ్ళు మాత్రమే కనిపించే వాళ్ళు

మనుషులు ? కాదు మానవమృగాలు

ఇందరిని చంపి

ఇందరిని హింసించి

ఇందరి‌ రక్తాన్ని రుచి‌చూసి

ఇందరిని కన్నీళ్లకు గురిచేసి

ఇందరిని అష్టకష్టాల పాల్జేసి

ఇందరిని కన్నీళ్లకు గురిచేసి

ఆప్ఘాన్ పిల్లలబంగారు

భవిష్యత్తును భగ్నంచేసి

మానవతా విలువల్ని

మహిళా హక్కుల్ని కాలరాచి

వ్యతిరేకులందరిని బందీలనుచేసి

చిక్కినవారిని‌ చిత్రహింసలకు గురిచేసి

ప్రజలరక్తాన్ని రుచిచూసి ప్రాణాలుతీసి

వారు పొందేది మోక్షమా ? కాదు కాదే

రాజ్యకాంక్షకు రాక్షసానందానికిది ప్రత్యక్షసాక్ష్యమే

11.తాలిబాన్లా ? త్రాచుపాములా?

అల్లాకోరునా

అల్లకల్లోలం...లేదే

మరి తాలిబాన్లెందుకు

త్రాచుపాముల్లా

బులుసు కొడుతున్నారు ?

పగబట్టి

ఇంటింటి

తలుపుతట్టి

కనిపించిన శత్రువునల్లా

కసిగా కాటు వేస్తున్నారు

పులుల్లా వెంటాడి వేటాడి

నిర్ధాక్షిణ్యంగా పిట్టల్లా

కాల్చి చంపేస్తున్నారు

అందరిదీ...ఒకే రక్తం

అందరిదీ...ఒకే జాతి

అందరి...దైవం ఒక్కరే

అందరి ప్రార్థన...ఒక్కటే

ప్రపంచాన ప్రతిమనిషి

జీవితాన శాంతి శాంతి శాంతి

ఎందుకో ?మరెందుకో ?

ఈ కక్షలు‌...కార్పణ్యాలు ?

ఈ రగిలే పగలు...ప్రతీకారాలు?

ఈ దారుణ...మారణహోమాలు?

ఎందుకు ? ఎందుకు ? ఎందుకు?

జీహాద్ పేర‌ నడిరోడ్డుపై ఆ నరమేధం

ఎందుకు? ఎందుకు? ఎందుకు ?

ఈ అరాచకత్వానికి...ఈ అల్లకల్లోలానికి

అసలు కారణం ఎవరికెరుక ఆ అల్లాకు తప్ప

12. రాక్షసులే రాజులైతే....

ఆఫ్ఘనిస్తాన్

అగ్నిగుండంలా

మండినంతకాలం

రావణకాష్టంలా రగిలినంతకాలం

ఏ దేశనేతలకూ కంటిమీద కునుకుండదు

ఎవరి బ్రతుకులోను శాంతి సమాధానముండదు

శాంతి కపోతాలు నింగికెగరాలంటే

ప్రజాస్వామ్య పాలన ప్రభవించాలంటే

ప్రజలు స్వేచ్చా వాయువుల్ని పీల్చాలంటే

మానవత్వపు పరిమళాలు వెల్లివిరియాలంటే

రాజ్యకాంక్షతో రెచ్చిపోయే తాలిబాన్ల

దాష్టీకాలను ‌దౌర్జన్యాలను

అన్యాయాలను అక్రమాలను

కర్కషత్వాన్ని‌ కట్టడి చేయాలే

ముస్కర మూకల్ని ముట్టడి చేయాలె

కాబూల్ లోనే వారిని ఖననం చేయాలే

అరచేతిలో అత్యంత శక్తివంతమైన

అణు బాంబులున్న అగ్రరాజ్యాలన్నీ

గుడ్లగూబల్లా గుడ్లప్పగించి చోద్యంచూస్తే ఎలా?

ఆ ఉన్మాదుల

ఆ ఉగ్రవాదుల

ఆ మూర్ఖుల

ఆ ముస్కరుల ముప్పు

అమాయకులైన ఆఫ్ఘాన్లకే పరిమితమా? కాదే !

ఇరుగుపొరుగు దేశాలకు అగ్రరాజ్యాలకు కూడా

కారణం వారు నరరూపరాక్షసులకు ప్రతిరూపాలు !

మనుష్యుల ముసుగులో తిరిగే మానవమృగాలు !

విభజించే విధ్వంసం సృష్టించే

అమెరికా సైనికులు అత్యాధునిక

ఆయుధాలందించిన యమకింకరులు భయంకరులు

ఔను రాక్షసులకే రాజ్యాధికారం దక్కితే

ఏపాపమెరుగని అమాయకపు ప్రజలరక్తం

ఏరులై పారడం తధ్యమే రేపటి రక్తచరిత్రకు శ్రీకారమే

13.ఏది నిజమైన సంక్రాంతి ?

ఇంటినిండా గాదెలనిండా

ధనరాశులుంటే సరిపోదు

ఆ గుండెలనిండా

సుఖశాంతుల ధనరాశులుండాలి

ఇంటి కుటుంబసభ్యుల

మధ్య సత్సంబంధాలుంటే సరిపోదు

అందరి గుండెల్లో అనురాగం

ప్రేమ ఆత్మీయతలు వెల్లివిరియాలి

పగలు ప్రతీకారాలు లేని స్వచ్ఛమైన

మానవ సంబంధాలుంటే సరిపోదు

ఆ మనుషులందరు మానవీయ

విలువల్ని మరువకుండా ఉండాలి

పదిమందికి ప్రేమను పంచితే సరిపోదు

పేదలకు అనాధలకు విధవలకు

వికలాంగులకు దానధర్మాలు చేయాలి

కలతలు కన్నీళ్లు లేకుండాఉంటే సరిపోదు

అందరు కలిసి మెలిసి ఉండాలి

మంచితనంతో మానవత్వంతో బ్రతకాలి

అప్పుడే అందరి బ్రతుకులు ధన్యమౌతాయి

అదే నిజమైన సంక్రాంతి అప్పుడే జీవితాన నవ్య క్రాంతి

14. చెప్పలేము... మినీ కవిత

ఏ చెట్టు చెప్పలేదు

తనకెన్ని కొమ్మలు రెమ్మలు

వేర్లు ఆకులున్నాయోనని

ఎన్నికాయలు కాశాయోనని

ఏ పూలమొక్క చెప్పలేదు

తనకెన్నిపూలు పూశాయోనని

ప్రకృతి ధర్మాన్ని పాటించడం తప్ప

ఏ మనిషి చెప్పలేడు తన తలపై

ఎన్ని వెంట్రుకలున్నాయోనని

ఖచ్చితంగా చెప్పలేడు

కాకిలేక్కలు వేయడం తప్ప

ఏ తల్లి చెప్పలేదు

తనకడుపెప్పుడు

పండుతుందోనని

తానకెంతమంది

పిల్లల్ని పుడతారోనని

ఖచ్చితంగా చెప్పలేదు ముక్కోటి

దేవుళ్ళకు మొక్కడం తప్ప

ఆట ముగిసేవరకు,

ఏ ఆటగాడు చెప్పలేడు

తనకే కప్పని తనదే గెలుపని

ఖచ్చితంగా చెప్పలేడు

ఆ పరమాత్మను ప్రార్థించడం తప్ప

రిజల్ట్స్ వచ్చేవరకు,

ఏ విద్యార్ది చెప్పలేడు

తనకే ర్యాంకు వస్తుందోనని

ఖచ్చితంగా చెప్పలేడు

గాలిలో మేడలు కట్టడం తప్ప

ఓట్లలెక్కింపు పూర్తి అయ్యేంతవరకు

ఏ నాయకుడు చెప్పలేడు

తనకెన్నిఓట్లు వస్తాయోనని

ఖచ్చితంగా చెప్పలేడు

ఊహల్లో ఊరేగడం తప్ప

15.నిన్నటి తేనె‌...నేడు విషం ?

అందమైనదని

ఆస్తిపాస్తులున్నాయని

ఇష్టపడి మూడుముళ్ళువేసి

ఎన్నో ఏళ్లు‌ హాయిగా

కలిసి‌ కాపురం చేయగా

భార్యంటే మోజు కాస్త తగ్గిపోవచ్చు

నిన్నటి తియ్యటి బెల్లం

నేడు అల్లం కావచ్చు

నిన్నటి ప్రాణదేవత

నేడు దెయ్యం కావచ్చు

నిన్నటి తేనెచుక్క

నేడు విషపుచుక్కకావచ్చు

రోజు రోజుకు ప్రేమజ్వాల

కాసింత కాసింత చల్లారిపోవచ్చు ఆపై

"పరస్త్రీ వ్యామోహం"లో పడిపోవచ్చు

అది అత్యంత ప్రమాదకరం కావొచ్చు

మనిషి వ్యక్తిత్వానికి

చెరగని మాయని మచ్చకావచ్చు

నిన్నటి ఆ మూడుముళ్లు

మూన్నాళ్ళ ముచ్చట కావచ్చు

విధి విడదీయవచ్చు విడాకులతో

ఆ ఇరువురనుభవించే

స్వేచ్ఛా స్వాతంత్ర్యాలకు

ఇనుపసంకెళ్లు పడవచ్చు అందుకే

ఓ దంపతులారా ! జాగ్రత్త తస్మాత్ జాగ్రత్త !

16.ఓర్పు నశించిన ఓటరు ...

నిన్న స్వాతంత్య సమరాన

సాహిత్య సాగరాన శ్రీశ్రీ కలాన

...పొంగిన అల !

కాదేదీ కవితకనర్హం...

నేడు రాబోయేకాలానికి

కాబోయే రాజకీయనాయకులుకన్న

...రంగుల కల !

కాదేదీ కమీషన్లకనర్హం...

నిన్న పట్టపగలే ప్రజల్ని దోచుకున్న

...గజదొంగలు !

నేడు చట్టసభలకు ఎన్నికై వున్న

...కొల్లేటి కొంగలు !

నిన్న కూటికేలేక కుమిలిపోయిన

...కుచేలులు !

నేడు కుంభకోణాల్లో ఆరితేరిన

...కుబేరులు !

నిన్న ఓట్లకోసం బిక్షమెత్తిన

...శనీశ్వరులు !

నేడు కోట్లకు పడగలెత్తిన

...కోటీశ్వరులు !

నిన్న ప్రగతికాముకులు

...ప్రజాబంధువులు !

నేడు ప్రజల రక్తాన్నిత్రాగే

...రాజకీయరాబందులు !

జానెడు పొట్ట కోసం

జాతికి ద్రోహంచేసే

...ఓ జలగలారా !

కన్నతల్లి కన్నీటిని త్రాగే

...ఓ కసాయివాళ్లారా !

నీడనిచ్చే కొమ్మలను నరికే

...ఓ నీచులారా !

ఒక్కనిజం తెలుసుకోండి !

ఓటరంటే..."త్రినేత్రుడని"

కళ్ళు తెరిచి కరుణిస్తే మీరు

రివ్వున ఎగిరే తారాజువ్వలౌతారని...

కానీ..."ఓర్పు నశించిన ఆ ఓటరే"

ఆగ్రహించి ఉగ్రరూపం దాలిస్తే

రెప్పపాటు మీరంతా కుప్పకూలిపోతారని...

17.కరోనా సుభాషితాలు- కాంతి కిరణాలు-

మనది కానిది మనకు

దక్కాలనుకోవడం ధర్మమా ?

మనకు దూరమైనది మనకు

చిక్కాలనుకోవడం న్యాయమా?