ఓ నా భరతమాత ముద్దుబిడ్డలారా..!
(యువతకు వివేకానందుని సందేశం)
ఓ నా భరతమాత ముద్దుబిడ్డలారా..!
మీరు పాపులు కాదు పరమపవిత్రులు...
మీరు వృద్ధులు కాదు యువకిశోరాలు...
మీరు బలహీనులు కాదు బాహుబలులు...
పిరికివాళ్ళం మేమేమీచెయ్యలేమనకండి...
శవాలే నయమనేలా బానిసలై బ్రతక్కండి...
వీరులై విజయశంఖారావాన్ని పూరించండి...
ఓ నా భరతమాత ముద్దుబిడ్డలారా..!
మేము ఏదైనా సాధించగలమనే
అఖండ విశ్వాసంతో అగ్నికణాలై...
ఇనుప కండరాలతో ఉక్కునరాలతో
శత్రువులకు సింహస్వప్నం కావాలి...
ఉత్తర కుమారులవోలె ఉరమకండి...
చీల్చే చిరుతలై ముందుకు దూకండి...
ఓ నా భరతమాత ముద్దుబిడ్డలారా..!
లేవండి మీరు సింహాలని గుర్తుంచుకోండి...
మీ గమ్యం చేరేవరకు మీ పరుగు ఆపకండి...
భయపడకండీ ధైర్యంగా బలంగా వుండండి...
అభివృద్ధికి సోపానం సాహసం సత్సంకల్పమే...
బలం ఒక జననమే బలమహీనత ఒక మరణమే...
ఓ నా భరతమాత ముద్దుబిడ్డలారా..!
బద్దకమొక బద్దశత్రువు అదొక మాయరోగం ఆ
వింతరోగంతో వీధిలో తిరిగే హక్కు మీకెక్కడిది?...
వెలిగే సూర్యున్ని చూస్తే చీకటి భయపడుతుంది...
శ్రమించే మనిషిని చూస్తే ఓటమి భయపడుతుంది...
విశ్రమించక శ్రమించేవారు విశ్వవిజేతలై వర్ధిల్లుతారు.
రచన:
"కవి రత్న"
"సహస్ర కవి"
పోలయ్య కూకట్లపల్లి
అత్తాపూర్ హైదరాబాద్
చరవాణి...9110784502
Comments
Post a Comment