సుందర నందన వనాలు......
యువతా ! ఓ నవయువతా !
మీ చూపులు చురకత్తులు కావాలి
మీ కళ్ళెప్పుడూ నిప్పుల్ని విరజిమ్మాలి
మీరు పులులై చిరుతపులులై సింహాలై
శూరులై యుద్ధవీరులై శతృవుల్ని వేటాడాలి
యువతా ! ఓ నవయువతా !
వొద్దు ఒంటరిపోరాటం వొద్దు మీరు
సమిష్టిగా యుద్దానికి సిద్ధం కావాలి
యుద్దభేరిని మ్రోగించాలి పోరాడాలి
శతృవుల గుండెల్లో ఫిరంగుల్ని పేల్చాలి
రక్తపాతరహితంగా విజయకేతనమెగరేయాలి
యువతా ! ఓ నవయువతా !
మీ అరుపులు ఆకాశంలో మెరుపులు కావాలి
మీ ఉగ్రరూపంతో నింగిలో ఉరుములు పుట్టాలి
మీరు పిడికిలి బిగించి సునామీలను సృష్టించాలి
మీరు భగభగమండే భాస్కరులుగా అవతరించాలి
యువతా ! ఓ నవయువతా !
ఎక్కడ అన్యాయం అక్రమం జడలు విప్పునో
అక్కడ మీ అడుగుల సవ్వడితో అలజడి పుట్టాలి
కన్నులున్న గుడ్డివారికి మీరు కంటిపాపలు కావాలి
నోరున్న మూగవారికి మీరు గర్జించే గళాలు కావాలి
చైతన్యరహితుల్ని మేల్కొల్పే అగ్నజ్వాలలవై రగలాలి
యువతా ! ఓ నవయువతా !
ధగధగ మెరిసే కీర్తికిరీటాలు మీరు ధరించాలి
శాంతి కపోతాలను నింగిలోకి ఎగురవేయాలి
హిమగిరి శిఖరమంత ఎత్తుకు మీరు ఎదగాలి
మీ కమ్మని కలలన్నీ పండాలి....మీ జీవితాలు
సుఖశాంతుల సుందర నందనవనాలు కావాలి
రచన:
"కవిరత్న"
"సహస్రకవి"
పోలయ్య కూకట్లపల్లి
అత్తాపూర్ హైదరాబాద్
చరవాణి...9110784502
Comments
Post a Comment